Traditoinal Banana Soup

20200508_081836-01

Traditoinal Banana Soup

ငှက်ပျောသီးဟင်းခါး

ဒီတစ်ခေါက်မှာတော့ ရွာကိုရောက်တိုင်း ချက်စားဖြစ်တဲ့ ငှက်ပျောသီးဟင်းခါးလုပ်နည်းအကြောင်းကိုပြောပြပေးပါမယ်။ လုပ်ရတာအရမ်းလွယ်သလောက် စားရတာအရမ်းအရသာရှိပြီး ထမင်းမြိန်စေမယ့် အရည်သောက်ဟင်းတစ်ခွက်ပါ။ လုပ်ပုံလုပ်နည်းကတော့ ကြက်ဥကြော်ရသလောက်ကို ရိုးရှင်းလွန်းပါတယ်။

ပါဝင်ပစ္စည်းများ

ဖီးကြမ်းငှက်ပျောသီးအစိမ်း – ၄ လုံးခန့် (ဟင်းခါးတစ်အိုးစာ)
ပုစွန်ခြောက် – အချိုခြောက် အနေတော်အကောင် (ဟင်းခါးတစ်အိုးစာ)
ဟင်းခတ်မှုန့် – အနည်းငယ်ငရုတ်ကောင်းမှုန့် – အနည်းငယ်
ငံပြာရည် – အနည်းငယ်
ဆား – အနည်းငယ်
ကြက်သွန်ဖြူ – ၄ မွှာ (သို့) ၅ မွှာခန့်

ရှေးဦးစွာ ဟင်းခါးပြုလုပ်ဖို့အတွက် အိုးထဲသို့ ရေထည့်ကာ ပွက်ပွက်ဆူလာသည်အထိ တည်ပေးရပါမယ်။ ငှက်ပျောသီးကို ထပ်ခြမ်းခွဲကာ ၁၅ မိနစ်ခန့်ရေစိမ်ထားရပါမယ်။ ပွက်ပွက်ဆူလာပါက ဟင်းရည်ထဲသို့ ထပ်ခြမ်းခွဲထားသော ငှက်ပျောသီးအသားများကို ဇွန်းဖြင့် ခြစ်ထည့်ပေးရပါမယ်။ ထို့နောက်တွင် ငှက်ပျောသီးအသားများ နူးအိလာသည်အထိထားပြီး ပုစွန်ခြောက်၊ ငရုတ်ကောင်းမှုန့်နဲ့ အပေါ့အငံကို မိမိစိတ်ကြိုက်အနေအထားအထိထည့်ပေးရပါမယ်။ ကြက်သွန်ဖြူအမွှာလေးတွေကိုထောင်းထည့်ပေးရပါမယ်။

ငှက်ပျောသီးဟင်းခါးက တောရွာတွေမှာချက်စားလေ့ရှိပြီး ငပိရည်၊ လတ်လတ်ဆတ်ဆတ်တို့စရာတွေနဲ့ တွဲဖက်စားရင် လွန်စွာမှ ထမင်းမြိန်စေပါတယ်။ ကိုယ်တိုင်လွယ်လွယ်ကူကူနဲ့ လုပ်စားလို့ရတဲ့ ငှက်ပျောသီးဟင်းခါးချက်နည်းကို ဒီတစ်ပတ်ပိတ်ရက်မှာ လုပ်စားကြည့်ကြပါဦး။

Anyar Tamarind leaf salad

mgi salad

Anyar Tamarind leaf salad

အညာ မန်ကျဉ်းရွက်သုပ်

နေရာဒေသအလိုက် မန်ကျည်းရွက်သုပ်နည်း ပုံစံမျိုးစုံရှိတဲ့အထဲက ကျွန်မကတော့ အညာဘက်ကလူတွေ သုပ်စားလေ့ရှိတဲ့ စားတော်ပဲပြုတ် ထည့်သုပ်တဲ့ မန်ကျည်းရွက် အဆိမ့်သုပ်လေးကို ပိုကြိုက်ပါတယ်။ အညာမန်ကျည်းရွက်သုပ်လေး ဘယ်လိုသုပ်လဲ ကြည့်လိုက်ရအောင်။

ပါဝင်ပစ္စည်း

မန်ကျည်းရွက် နုနု – ၁ စည်း
စားတော်ပဲ ပြုတ် – အနည်းငယ်
ကြက်သွန်နီ – ၁ ဥ (အလုံးကြီး)
ဆား – အနည်းငယ်
ဟင်းခတ်မှုန့် – အနည်းငယ်
ဆီ – အနည်းငယ်

ပြုလုပ်နည်း

မန်ကျည်းရွက်နုလေးတွေကို ခြွေထားပါမယ်။ကြက်သွန်နီနဲ့ ငရုတ်သီးစိမ်းကို ပါးပါးလှီးထားပါ။ပါဝင်ပစ္စည်းအားလုံးကို ရောနယ်ပါမယ်။နယ်တဲ့အခါ ပဲပြုတ်တွေ အလုံးမပျက်အောင် ဖွဖွလေး နယ်ပေးရပါမယ်။အရသာ အပေါ့အငန် စိတ်ကြိုက်ပြင်ဆင်ပြီး သုံးဆောင်လို့ရပါပြီ။အချဉ်ကြိုက်ရင် သံပရာရည် အနည်းငယ် ညှစ်ထည့်နိုင်ပါတယ်။ အဆိမ့်သုပ်တာ ပိုစားကောင်းပါတယ်။

ဘိုကလေး တပဲလေးသုပ် – မငြိမ်းသုပ်

frame

ဘိုကလေး တပဲလေးသုပ် – မငြိမ်းသုပ်

ဘိုကလေး တပဲလေးသုပ် - မငြိမ်းသုပ်

ရန်ကုန်မှာ စားရခဲတဲ့ ဘိုကလေး တပဲလေးသုပ် လုပ်နည်းလေး ပြောပြချင်ပါတယ်။ တပဲလေးသုပ်ဆိုတာ ညှပ်ခေါက်ဆွဲကို ပုစွန်ဟင်းအနှစ်နဲ့ သုပ်ထားတဲ့ ညှပ်ခေါက်ဆွဲသုပ် တစ်မျိုးပါ။

ပါဝင်ပစ္စည်း

ညှပ်ခေါက်ဆွဲလှော် အတွက်
===================
● ညှပ်ခေါက်ဆွဲ – ၅၀ ကျပ်သား
● ပဲငံပြာရည် အပျစ် – အနည်းငယ်
● ဆီ – အနည်းငယ်

ပုစွန်ဟင်းအတွက်
============
● ပုစွန် – ၃၀ ကျပ်သား
● ကြက်သွန်ဖြူ- ၄ မွှာ
● ကြက်သွန်နီ – ၂ မွှာ
● ဆီ – ၂၀ ကျပ်သား
● အရောင်တင်မှုန့် – အနည်းငယ်
● ငံပြာရည် – အနည်းငယ်
● နနွင်း – အနည်းငယ်

ဟင်းခါးအတွက်
===========
● ပဲပင်ပေါက်(သို့မဟုတ်)ဘူးသီး
● ပုစွန်ခြောက် အနည်းငယ်
● ရေ
● ဆား
● ဟင်းခတ်မှုန့်
● ငရုတ်ကောင်းမှုန့်

အသုပ်အတွက်
==========
● ပဲကျက်မှုန့်
● ငရုပ်သီးမှုန့်
● ဟင်းခတ်မှုန့်
● ငံပြာရည်
● မန်ကျည်းရည်
● ကြက်သွန်နီ – ပါးပါးလှီး
● ရှောက်ရွက် – ပါးပါးလှီး
● နံနံပင် – ပါးပါးလှီး
● ပဲပင်ပေါက် ရေနွေးဖြော

ညှပ်ခေါက်ဆွဲလှော်အတွက် ပဲငံပြာရည်အပြစ်နဲ့ရောနယ်ထားတဲ့ ညှပ်ခေါက်ဆွဲကို ဆီပူနဲ့အနည်းငယ် လှိမ့်ထားပါမယ်။

ပုစွန်ဟင်းချက်ရန်အတွက် ပုစွန်အား ခေါင်းဖြုတ် အခွံ နွှာပြီး အတုံးလေးများ တုံးထားပါ။ဆီပူလာပါက ကြက်သွန်ဖြူနီထောင်းထားသည်အား နနွင်း၊ငရုတ်သီးအရောင်တင်မှုန့်တို့ဖြင့် မွှေးလာသည်အထိ ဆီသတ်ပါ။ငံပြာရည်ထည့်ပါ။ပုစွန်ထည့်ပြီး လိုအပ်ပါက ရေအနည်းငယ်ထည့်ပါ။ဆီပြန်လာရင် ရပါပြီ။

ဟင်းခါးအတွက်က ပဲပင်ပေါက်နဲ့ ဘူးသီး ကြိုက်ရာသုံးလို့ရပါတယ်။၂မျိုးရောသုံးလဲ ရပါတယ်။ရေဆူအောင်တည်ပြီး ရေဆူလာပါက ပုစွန်ခြောက်နဲ့ ဆားထည့်ပါ။ဘူးသီးကို အချောင်းသေးသေးနဲ့ခပ်ပါးပါးလေးတွေ လှီးထားတာထည့်ပါ။ဘူးသီးနူးပါက ငရုတ်ကောင်းခတ်ပါ။အရသာ အပေါ့အငံ စိတ်ကြိုက် ပြင်ဆင်ပါ။

အသုပ်သုပ်ဖို့အတွက် ပါဝင်ပစ္စည်းစုံပြီဆိုရင် စသုပ်ပါမယ်။တစ်ပွဲစာအတွက် ညှပ်ခေါက်ဆွဲ အနည်းငယ် ၊ပုစွန်ဟင်း ၁ဇွန်း၊ပဲပင်ပေါက်၊ရှောက်ရွက်၊ကြက်သွန်နီ၊နံနံပင်၊ပဲကျက်မှုန့်၊ငရုတ်သီးမှုန့်၊ဟင်းခတ်မှုန့်၊မန်ကျည်းရည်တို့ ထည့်နယ်ပါမယ်။အငံလိုပါက ငံပြာရည်ထပ်ထည့်နိုင်ပါတယ်။ပုစွန်ဟင်းထဲမှာလဲ ငံပြာရည်ပါတဲ့အတွက် မြည်းကြည့်ပြီးမှ ထပ်ထည့်ပါ။

တပဲလေးသုပ်ကို ဟင်းခါးပူပူလေးနဲ့ တွဲဖက်စားသုံးနိုင်ပါပြီ။

Magyi Htaung

magyi copy

Magyi Htaung

မန်ကျည်းရွက်ထောင်း

အခုချိန် မန်ကျည်းရွက်နုနုလေးတွေ ပေါတဲ့ရာသီမှာ မန်ကျည်းရွက်နုထောင်းလေး လုပ်စားကြရအောင်။

ပါဝင်ပစ္စည်း


မန်ကျည်းရွက်နုနု – ၁ စည်း
ကြက်သွန်ဖြူ – ၃ မွှာ
ကြက်သွန်နီ – ၁ ဥ
ငရုတ်သီးစိမ်း – ၅ တောင့်
ဆား – အနည်းငယ်
ဟင်းခတ်မှုန့် – အနည်းငယ်
မြေပဲဆီ – အနည်းငယ်

ပြုလုပ်နည်း

မန်ကျည်းရွက်နုနုလေးတွေကို ရေဆေးပြီး အရွက်ခြွေပါ။ငရုတ်ဆုံထဲမှာ ကြက်သွန်ဖြူ၊ ငရုတ်သီးစိမ်းနဲ့ ကြက်သွန်နီကို ပါးပါးလှီးပြီး ထည့်ထောင်းပါ။မညက်တညက် အနေအထားမှာ ဆား၊ဟင်းခတ်မှုန့်နဲ့ မန်ကျည်းရွက်ထည့်ထောင်းပါ။ ညက်ရင် မြေပဲဆီလေးဆမ်းပြီး စားနိုင်ပါပြီ။

ချဉ်ချဉ်ဖန်ဖန်လေး အရသာထူးတဲ့ မန်ကျည်းရွက်ထောင်းလေး လုပ်စားကြည့်ကြနော်။

Namphit Htaung

nam phit

Namphit Htaung

နန့်ဖစ်ထောင်း

ရှမ်းရိုးရာ အစားအစာ တစ်ခုဖြစ်တဲ့ နမ့်ဖစ်ထောင်းနည်းလေး ဖော်ပြပေးပါမယ်

ပါဝင်ပစ္စည်း


ရှမ်းပဲပုတ် – ၁ ချပ်
ခရမ်းချဉ်သီး – ၃ လုံး
ငရုတ်သီးစိမ်း – ၆ တောင့်
ကြက်သွန်နီ – ၁ ဥ
ရှမ်းနံနံ – အနည်းငယ်
နံနံပင် – အနည်းငယ်
ဆား – အနည်းငယ်

ပြုလုပ်နည်း


ခရမ်းချဉ်သီးတွေကို ရေစင်အောင်ဆေးပြီး မီးဖုတ်ပါမယ်။အလွယ်တကူ မီးဖုတ်လို့မရရင် ပြုတ်လို့ရပါတယ် ။မီးဖုတ်ရင်တော့ အနံ့အရသာပိုမွှေးပါတယ်။ခရမ်းချဉ်သီးအစား ပင်စိမ်းသီးကို ပြုတ်ပြီးလည်း ထည့်လို့ရပါသေးတယ်။ပြီးရင် ကြက်သွန်ဖြူ၊ငရုတ်သီးစိမ်းတွေကိုလည်း မီးဖုတ်ပါမယ်။မတူးအောင် ဂရုစိုက်ပါ။ပဲပုတ်ကိုတော့ မွှေးလာရုံ မီးအနည်းငယ်ပြပြီး အမှုန့်ထောင်းထားပါမယ်။
မီးကင်ထားတဲ့ ခရမ်းချဉ်သီးတွေရပြီဆိုရင် ငရုတ်သီးစိမ်း၊ ကြက်သွန်ဖြူ၊ရှမ်းနံနံတို့နဲ့ ရောထောင်းပါမယ်။အရသာအတွက် ဆားနဲ့ ဟင်းခတ်မှုန့် အနည်းငယ်ထည့်ပါ။ထောင်းထားတာ ညက်သွားပြီဆိုရင် ပဲပုတ်မှုန့်နဲ့ရောပါမယ်။ မြန်မာနံနံပင်ကိုတော့ ပါးပါးလှီးပြီး ထည့်ပါမယ်။

နမ့်ဖစ်ထောင်းကို အတို့အမြှုပ်မျိုးစုံနဲ့ တွဲဖက်သုံးဆောင်နိုင်ပါတယ်။

Myeik Ngapi Thoke

myeik copy

Myeik Ngapi Thoke

မြိတ်ငပိသုပ်

အိမ်မှာ မြိတ်ငပိသုပ် သုပ်တဲ့နေ့ဟာ ထမင်းမြိန်တဲ့နေ့ပါပဲ။မြိတ်ငပိသုပ်ကို မြိတ်ဘက်က ပိဖျော်လို့ခေါ်ပြီး တွဲဖက်စားသုံးတဲ့ တို့စရာတွေကိုတော့ ပိရှာလို့ခေါ်လေ့ရှိပါတယ်။
မြိတ်ငပိသုပ် သုပ်တဲ့အခါမှာ အချဉ်အဖြစ် ရာသီပေါ်အသီးအနှံတွေကိုလည်း ထည့်သုပ်လေ့ရှိပါတယ်။ဥပမာ မရမ်းသီးပေါ်ချိန်ဆို မရမ်းသီးပါးပါးလှီးပြီး ထည့်သုပ်တာမျိုး။သီဟိုဠ်သီး၊ ရင်ကမ်းသီး၊သစ်တိုသီး စတဲ့ ချဉ်တဲ့အသီးတွေကိုလည်း ထည့်သုပ်တာမျိုးပေါ့။
အခုသုပ်နည်းမှာတော့ အိမ်မှာ အလွယ်တကူ သုပ်စားလို့ရအောင် သံပရာသီးအသုံးပြုထားပါတယ်။တို့စရာကိုတော့ ကိုယ်ကြိုက်နှစ်သက်ရာနဲ့ တို့နိုင်ပါတယ်။

ပါဝင်ပစ္စည်း


မြိတ်ငပိဖုတ် – ၂ ဇွန်း(စားပွဲတင်ဇွန်း)
ကြက်သွန်နီ – ၂ လုံး (အနေတော် )
ငရုတ်သီးစိမ်း – ၁၀ တောင့်
ပုစွန်ခြောက်အကောင် – ၁ ဇွန်း (စားပွဲဇွန်း)
ငရုတ်သီး အကြမ်းဖတ် – ဇွန်းတစ်ဝက် (စားပွဲဇွန်း)
သကြား – ၂ ဇွန်း (လက်ဖက်ရည်ဇွန်း)
သံပရာသီး – ၁ လုံး (အလုံးကြီး)

ပြုလုပ်နည်း

ပုစွန်ခြောက်ကို ငရုတ်ဆုံထဲ ထည့်ပြီး ခပ်ကြမ်းကြမ်းထောင်းထားပါ။ပြီးရင် ငရုတ်သီးအကြမ်းဖတ် ထည့်ထောင်းပါ။ငရုတ်သီးအကြမ်းဖတ်များ အနည်းငယ် ညက်သွားပါက ငရုတ်သီးစိမ်းနှင့် သကြားထည့်ထောင်းပါ။ပြီးရင် ငပိထည့်ထောင်းပါ။

ထောင်းထားသည်များ ရပါက ငပိဖျော်မည့် ပန်းကန်ထဲသို့ ပြောင်းထည့်ပါ။ကြက်သွန်နီကို ပါးပါးလှီးပြီးထည့်ပါ။ပြီးရင် သံပရာရည် ညှစ်ထည့်ပြီး နှံ့စပ်အောင်မွှေပါ။အချဉ်အနည်းငယ် ပေါ့လိုပါက သကြားအနည်းငယ် ထပ်ထည့်နိုင်ပါတယ်။

Thingyan Htamin

frame

Thingyan Htamin

ရေနဲ့စားတဲ့ထမင်း (သို့မဟုတ်) သင်္ကြန်ထမင်း

မြန်မာတိုင်းရင်းသား မွန်လူမျိုးတို့ရဲ့ ရိုးရာအစားအသောက်ဖြစ်တဲ့ မွန်သင်္ကြန်ထမင်းက မြန်မာ့ရိုးရာအစားအစာထဲမှာ အတော်လေး ထူးခြားတယ်လို့ဆိုရမယ်။ နူးညံ့ပျော့ပြောင်းအောင် ချက်ထားတဲ့ ထမင်းကို ရေစိမ်စားရတာက ပုံမှန်အဆီအနှစ်နဲ့ စားနေကျ အစားအစာတွေနဲ့မတူပဲ တမူထူးခြားလှပါတယ်။

ရေစိမ်ထားတဲ့ ထမင်းကို ငါးခြောက်ထောင်းကြော်၊ ငရုတ်သီး အတောင့်ခြောက်ကြော်တို့နဲ့ တွဲဖက်စားသုံးရပါတယ်။ သင်္ကြန်ထမင်း ချက်ပြုတ်ရာမှာ အဓိကလိုအပ်တာကတော့ ဆန်အရည်အသွေးကောင်းဖို့ပါပဲ။ ဆန်ကို စင်းလုံးချောသန့်စင်သွားအောင်ပြုလုပ်ပြီးမှ ပုံမှန်စားနေကျ ထမင်းထက်ပိုပျော့အောင်ချက်ရပါတယ်။ ဒါပေမယ့်လည်း ဆန်ပြုတ်လောက် ပျော့သွားတဲ့အထိလည်း ချက်လို့မရပါဘူး။

သင်္ကြန်ထမင်းရဲ့ အဓိက တွဲစားရတဲ့ ငါးခြောက်ထောင်းကြော်နဲ့ ငရုတ်သီးခြောက်ကြော်ရဲ့အရသာကလည်း လွန်စွာမှ အရေးပါလှပါတယ်။ ငရုတ်သီးခြောက်ကြော်ရဲ့ အစပ်အရသာနဲ့ ငါးခြောက်ထောင်းကြော်ရဲ့အရသာကို တွဲစားရတာက ထူးခြားပါတယ်။ စားရင်းစပ်သွားတယ်ဆိုလည်း ထမင်းထဲက ရေခဲတုံးလေး ကိုက်လိုက်ယုံပဲ။

ဒီလိုရိုးရာအစားအစာမျိုးက အဆီအနှစ်အထူးတည်မပါဝင်တာကြောင့် ကျန်းမာရေးအတွက်လည်း လူတိုင်းစားလို့ရမယ်လို့ ထင်ပါတယ်။

မွန်သင်္ကြန်ထမင်း ချက်ပြုတ်ရာတွင် အဓိကလိုအပ်သည်မှာ ဆန်ကောင်းရန် ဖြစ်သည်။ ဆန်ကို မချက်ပြုတ်မီ ဆန်၌ပါဝင်နေသော ခဲသဲဖုန်များကို သန့်စင်သွားအောင် ရွေးချယ်ပြီး ရေဖြင့် စင်ကြယ်စွာဆေးကာ နူးညံ့ပျော့ပြောင်းသည်အထိ ချက်ရသည်။ (ဆန်ပြုတ်ကဲ့သို့ မဖြစ်စေရ၊ ပုံမှန်စားနေကြ ထမင်းထက်လည်း အနည်းငယ် ပျော့အောင် ချက်ရသည်။) ထမင်းချက်ပြီးပါက ထမင်းများကို ရေသန့်ရေအေးတို့ဖြင့် အထပ်ထပ်အခါခါ ထပ်မံဆေးပေးရသည်။ ရေဆေးပြီးပါက ဇကော၊ ဇကာထဲသို့ ထမင်းများကို လောင်းထည့်ကာ ရေစစ်ထားရမည် ဖြစ်သည်။ ထမင်းများ ရေစစ်သွားပါက သင်္ကြန်ထမင်းကို ရရှိပြီ ဖြစ်သည်။

Mote Nyin Paung

frame

Mote Nyin Paung

မုန်ညင်းပေါင်း

မနက်ခင်းစာအတွက် လွယ်လွယ်ကူကူ လုပ်စားလို့ရမယ့် မုန်ညင်းပေါင်းနည်းလေး ဖော်ပြပေးပါမယ်ရှင်။ မုန်ညင်းပေါင်းကို မနက်ခင်းစာအအဖြစ် ရေနွေးကြမ်းနဲ့ တွဲဖက်သုံးဆောင်နိုင်သလို ရှမ်းခေါက်ဆွဲ၊ မြီးရှည်တို့နဲ့လဲ တွဲဖက် သုံးဆောင် နိုင်ပါတယ်။အလိုက်ဖက်ဆုံးက ခေါပုတ်ကြော်လေးနဲ့ပါနော်။

ကဲ လုပ်ရတာ လွယ်ကူပြီး အဟာရပြည့်ဝတဲ့ မုန်ညင်းပေါင်းလေး လုပ်စားကြည့်ရအောင်။

ပါဝင်ပစ္စည်း


မုန်ညင်းရွက် – ၂ စည်း
ခရမ်းချဉ်သီး – ၁ လုံး
မြေပဲ – ၁ ဇွန်း (ဟင်းစားဇွန်း)
ဆန်မှုန့် – ၂ ဇွန်း ( ဟင်းစားဇွန်း)
ပဲပုတ် – ၁ ချပ်
ဆား – အနည်းငယ်
ဟင်းခတ်မှုန့် – အနည်းငယ်

 

တွဲဖက်စားသုံးရန်

ကြက်သွန်ဖြူဆီချက်
ငရုတ်သီးတောင့်ကြော်
ဂျူးမြစ်

ချက်ပြုတ်နည်း

မုန်ညင်းပေါင်းအတွက် မုန်ညင်းကို ပန်းအဝါလေးတွေပါတဲ့ မုန်ညင်းအမျိုးအစားကို သုံးထားပါတယ်။ပထမဦးဆုံး မုန်ညင်းအရွက်တွေချည်းပဲခြွေပြီး ဆားရည် ခဏ စိမ်ထားပါမယ်။ခရမ်းချဉ်သီးကိုလည်း ဆားရည်စိမ်ထားပါမယ်။

ပဲပုတ်ကို မီးအေးအေးနဲ့ မွှေးအောင် အချိန်ခဏလေးကင်ပြီး ထောင်းထားပါမယ်။ မြေပဲကိုလည်း ကွဲရုံလေး ထုထားပါမယ်။

ဆားရေစိမ်ထားတဲ့ မုန်ညင်းရွက်တွေကို ရေပြန်ဆေးပြီး ခပ်ပါးပါးလှီးပါမယ်။ခရမ်းချဉ်သီးကိုလည်း ပါးပါးလှီးပါမယ်။

ပါဝင်ပစ္စည်းတွေ အကုန်စုံပြီဆိုရင် ဇလုံတစ်လုံးထဲ စုထည့်ပြီး နှံ့အောင် နယ်ပါမယ်။အရသာ အပေါ့အငံ မြည်းပြီး စိတ်ကြိုက်ဖြစ်ပါက အပူခံနိုင်သည့် ကြွေပန်းကန်အပြန့်ထဲမှာ ငှက်ပျောရွက်ခင်းပြီး နယ်ထားတဲ့ အစာတွေထည့်ပါမယ်။မုန်ညင်းပေါင်းဖို့အတွက် ပေါင်းအိုးထဲ ရေတစ်ဝက်ထည့် အပေါ်ကဇကာခံပြီး ပေါင်းပါမယ်။

၁နာရီလောက် ပေါင်းပြီး အဖုံးဖွင့်ကြည့်တဲ့အခါ မုန်ညင်းရွက်နဲ့ ခရမ်းချဉ်သီးဖတ်တွေ နူးအိနေရင် ရပါပြီ။

မုန်ညင်းပေါင်းရရင် ပူပူနွေးနွေး အနေအထားမှာပဲ အပေါ်ကနေ ကြက်သွန်ဖြူ ဆီချက်လေးဆမ်း ငရုတ်သီးခြောက်တောင့်လေးကိုက် ဂျူးမြစ်လေးကိုက်ပြီး ရေနွေးကြမ်းလေးနဲ့ တွဲဖက်သုံးဆောင်ကြည့်ပါရှင်။

kyan khin rice salad

kyan kin copy

kyan khin rice salad

ကြံခင်း ထမင်းသုပ်

ကြံခင်း ထမင်းသုပ်

ထမင်းဖြူ
● ပဲဆီ
● ကြက်သွန်ဖြူ
● ငရုတ်သီးခြောက်
● ပုစွန်ခြောက်မှုန့် (သို့မဟုတ်)ငါးကျည်းခြောက်မှုန့်
● ကုလားပဲကျက်မှုန့်
● ငရုတ်သီး အလှော်မှုန့်
● ငံပြာရည်
● ဟင်းခတ်မှုန့်

 

တွဲဖက်စားရန်


ကြက်ကြော် ၊အမဲကြော် ၊ဝက်ကြော်
အချဉ် – ပဲတီချဉ်၊ သရက်သီးဆားရည်စိမ်၊ မရမ်းသီးဆားရည်စိမ် စသဖြင့် ကြိုက်နှစ်သက်ရာနဲ့တွဲစားနိုင်ပါတယ်။

ပြုလုပ်နည်း


– ကြံခင်းထမင်းသုပ်ဖို့အတွက် ပေါ်ဆန်းမွှေးဆန် ကောင်းကောင်းကို ချက်ထားပါမယ်။
– ဆီချက် အဝါချက်ဖို့အတွက် ကြက်သွန်ဖြူ ကို အကွင်းလေးတွေ လှီးထားပြီး နနွင်းမှုန့်နဲ့ ဆီချက် ချက်ထားပါမယ်။
– ဆီနီအတွက်က ငရုတ်သီးခြောက်ကို ဒယ်အိုးပူတွင် လှော်ပြီး ထောင်းထားပါ။ပြီးလျှင် ဆီပူအောင်တည်ထားပါ ဆီကျက်ပြီဆိုပါက ခေတ္တအအေးခံပြီး ထောင်းထားသည့် ငရုတ်သီးလှော်မှုန့်ဖြင့် ရောထားပါ။ဒါဆို ဆီနီရပါပြီ။
– ကြံခင်းထမင်းသုပ်ထဲ ထည့်သုပ်ဖို့အတွက် အကောင်းဆုံးက ငါးကျည်းခြောက်မှုန့်ပါ။ငါးကျည်းခြောက်ကို မီးအေးအေးနဲ့ မွှေးအောင်ဖုတ်ပြီး အမှုန့်ထောင်းထားပါ။မရှိရင် ပုစွန်ခြောက်အကောင်သန့်သန့်ကို မီးအေးအေးနဲ့ မွှေးအောင်ပြန်လှော်ပြီး အမှုန့်ထောင်းထားပါ။
– ကုလားပဲကျက်မှုန့် အစစ်ကိုလည်း မီးအေးအေးနဲ့ မွှေးအောင်ပြန်လှော်ထားပါမယ်။
– ငရုတ်သီး အလှော်မှုန့်ကိုလည်း ဆီအနည်းငယ်ထည့်ပြီး မီးအေးအေးနဲ့ ပြန်ကြော်ထားပါမယ်။
– ပါဝင်ပစ္စည်းတွေ အားလုံးစုံပြီဆိုရင်တော့ အရသာ လိုအပ်သလိုထည့်ပြီး မိမိစိတ်ကြိုက် သုပ်စားနိုင်ပါပြီ။

Chicken leg soup

5e6f1dd784698

Chicken leg soup

ကြက်ခြေထောက်ချဉ်စပ်ဟင်းရည်

ရာသီဥတုပူပူမှာ ဆိုင်ကိုတကူးတကသွားစားဖို့အချိန်မပေးချင်ဘူး၊ ကိုယ့်ဘာသာအိမ်မှာဖွယ်ဖွယ်ရာရာလေးတွေလုပ်စားဖို့ စိတ်ကူးထားတဲ့သူတွေအတွက် ဒီတစ်ခေါက်မှာကြက်ခြေထောက်ချဉ်စပ်ဟင်းရည်ပြုလုပ်နည်းအကြောင်းလေးကို ရေးပေးပါမယ်။ စားရတာအရသာရှိပြီး ချဉ်ချဉ်စပ်စပ်ကြိုက်သူတွေ အကြိုက်တွေ့မယ့် ကြက်ခြေထောက်ချဉ်စပ်ဟင်းရည်ပါ။

လိုအပ်သောပစ္စည်းများ

– ကြက်အရိုး၊ ကြက်ခြေထောက် (အသားကြိုက်ပါကလည်းထည့်သွင်းနိုင်)
– ကြက်သွန်နီအနေတော် ၃ လုံးမှ ၄ လုံး
– ငရုပ်သီးစိမ်း ဟင်းရည်တစ်ပွဲစာ
– ကြက်သွန်ဖြူ ဥကြီး ၄ မွှာ
– နနွင်းမှုန့်အနည်းငယ်
– သံပုရာသီး
– ဆား
– ဂျင်းအနေတော်

ကြက်သွန်ဖြု၊ နီ ဂျင်းနှင့် ငရုပ်သီးစိမ်းတို့ကိုရောထောင်းပါ။ အငံအရသာအတွက် ဆားအနည်းငယ်ထည့်ပေးရန်လိုပါသည်။ဟင်းခတ်မှုန့်အနည်းငယ်ထည့်ပါ။ ကြက်သွန်တွေကိုရောထည့်ပြီး အရိုးအသားတွေကိုရောနှယ်ပေးရပါမယ်။ ဆက်လက်၍အိုးထဲတွင် ဆီအနည်းငယ်ဖြင့်လုံးပေးရပါမယ်။ ပြီးရင်အရည်သောက်အတွက် ရေအနည်းငယ်ထည့်ပြီး ပြုတ်ရပါမယ်။ကျက်ခါနီးပြီဆိုရင်တော့ အချဉ်အရသာအတွက် သုံပုရာရည်အနေတော်ထည့်ပေးရပါမယ်။ အရသာရှိပြီး ချဉ်ချဉ်စပ်စပ်နဲ့စားလို့ကောင်းတဲ့ ကြက်ခြေထောက်ချဉ်စပ်ဟင်းရည်ပြုလုပ်နည်းလေးပါ။